أكتر من نصيبي
كلمات مرفت جابر
أخدت م الأيام نصيبي
والصراحه ..
كان زياده حبّتين
كنت باحلم ألقى جنّه
جاني حظّي بجنّتين
جنّة الإحساس بحبُّه
أمّا حضنه ..
جنّه تانيه من الحنين
عمري مش محسوب سنين
إنما أوقات سعيده
فيها إحساس التجلّي
يا حبيب القلب خلّي
حبّه للعمر اللي جي
رد قلبه بسرعه قاللي
إللي جي ف الحب أجمل
لمّا نور الحب يكمل
يبقى أكبر م النجوم
صدّقيني ف كل يوم
رح تلاقي الحب غير
كل ثانيه بلون مخالف
والثواني أكيد كتير
مرّه شجرة فاكهه طارحه
مرّه فوق الشجره طير
مرّه زهره تجيب عبير
كل ثانيه بعطر لون
قلبي رد عليه وقال له
عشقي لك حد الجنون
كل حب وله عيون
كل قلب وله بصيره
شافني بعيونه الأميره
قلبي شافه السندباد
حُب كان من غير ميعاد
جابلي أكتر من نصيبي
والزياده عشان حبيبي
حضنه بحر من الأماني
خدت أكتر من نصيبي
بس لسّه عايزه تاني
أصل إحساسي اللي جاني
حط طمع الكون ف قلبي
وبصراحه ومش ح اخبّي
قلبي ..
طمّاع ف الغرام
***********************
***********************
