كنت بتكلم مع روائي كبير أثناء الإعداد لرواية #الخاتن وبحكيله موضوعها، فبصلي باستغراب وقالي: وإشمعنى
الأكراد؟! يعني الدنيا ضاقت عليك!
حاولت أشرحله
الأسباب اللي دفعتني إني أدخل في منطقة تاريخية وجغرافية مدخلهاش روائي عربي،
طبعًا أول الأسباب دي فكرة إن الأكراد نسيج مغزول داخل الوطن العربي ويعتبروا
"قومية" مستقلة بذاتها، واتعرضوا بشكل مجحف للتهجير القسري والدبح
والمجازر الجماعية والتهميش من بعدها، إضافة لإن الفترة دي في تاريخ
الأكراد مش متنوّر عليها على قدر حجمها الحقيقي، يعني مثلًا محدش بيتكلم عن
ملابسات دك الأكراد وتحالف القوى الدولية مع الأتراك ضدهم، لدرجة إن كل المعاهدات
بعد الحرب العالمية الأولى خلت من ذكرهم وكإنهم أُبيدوا للأبد، مع التأكيد إن
الأكراد كانوا بيعتبروا أقوى قومية ثورية ضد الأتراك وضد انتهاكاتهم، إنما الحرب
العالمية الأولى خلّصت كل شيء.
بشكل ما عربيًا لم يتم استقبال الرواية بقضيتها اللي يمكن مكنتش مهمة للعرب
ولا مؤثرة فيهم، بدليل إننا دلوقتي وبعد صدور الرواية بأربع سنين مازال الموقف
العربي متخاذلًا تجاه القضية الكردية واللي بيجري ضد الأكراد في المنطقة العربية،
تخاذل وصمت لصالح الأتراك.
المنجز الكردي في تاريخنا العربي عظيم، ومحتاج بوست مفصّل. ❤️
#الخاتن
#الأكراد
#2016
***********************
***********************
