عابدين ابوالخير
(لو بتحبك وشرياك هتستناك)
(لو بتحبك وشرياك هتستناك)
لو شرياك هتستناك...
تلت كلمات و بيحكوا حكايات
وف وسط كل حكاية فيه ذكرايات
ومابين الذكرايات كنت انا منهم هناك
قالولي لو بتحبك وشرياك هتستناك...
جايز يكون كلامهم صح
وجايز يكون تفاهات
بس مش ف كل الحالات
اللي عاش التجربة
يختلف عن كل اللي فات
واللي شاف الوجع شلالات
بيلعن كل قالة دي حكايات...
قالولي لو بتحبك وشرياك هتستناك
ونسيوا يقولولي فيه نصيب هناك
سابوني علي عمايا اشوف بعيونهم
وعيونهم ماكنتش شيفاني ولا شيفاك
اتمسكت بالأمل وف لحظه الامل مات...
نسيوا يقولولي ان البنات كبارة
ونفسها تعيش الحياة بكل سعادة
وإن كل ام نفسها تشوف بنتها
عروسة وتهل عليها بفستان وطرحة
وحاطة عنيها علي ابن عمها
جاي من غربة وهيفرحها ببنتها
أو ان دا جاهز وعندة عربية وشقة
وراسمة حلم ف دماغها يعيشها ملكة...
ونسيت ان فيه واد غلبان بيحبها
وراسم أملة انة يفرح قلبها
هو مش ذنبة ان ظروفة صعبة
او ان الحياة جاية علية ومعاندة
ولسه معاة تعليم وجيش ومناهدة...
ظلموها معاة وقالولة لو شرياك هتسناك
طاب ايه ذنبها هيا تشيل هم مش همها
وتستحمل كلام يسم البدن وإية ذنبها
وإم تسخن نار لأبوها فيلسعوها
وتخلي بنتها كل يوم تنام ودموعها ع خدها
وبدل متنام مبسوطة بتفكر تقطع شراينها
وجايز كمان تكون حاولت وضميرها منعها
متظلموش بنت من كتر الوجع الدمع قتلها
دي كان ليها بسمه بتنور الضحكة ف عيونها
اختفت البسمة ف انطفي النور ف عيونها وقلبها...
لو بتحبك وشرياك هتستناك جملة اوعي تصدقها
وحارب الدنيا واوعي تتيأس لحد متوصلها
وإن القدر خانك وموصلتلهاش يكفيك شرف المحاولة
وأوعي تاني تشوف بعيونهم وأوعي تصدقها
(لو بتحبك وشرياك هتستناك)
عابدين ابوالخير
