بدون حسابات
كلمات مرفت جابر
.................
أنا طول الحياه عايشه
ف قلب طاحونه طحناني
وانا ف سوق الحياه
شاريه
برغم الدنيا بايعاني
وانا القلب اللي وزّعته
على العالم بدون حسابات
وداب قلبي من الأزمات
ما عادش فاضلّي شئ تاني
ودنيا تملّي جلداني
بكرباجها اللي مدهون
زيت
ما كنتش واخده ف
الحسبان
ولا قلبي بطبيعته حويط
ودايما حالة التخبيط
بتخبط قلبي ف الجدران
أدوق الموت وانا عايشه
واعيش مسجونه بالقضبان
بقلبي الكل يتدفّى
وقلبي يبات حزين بردان
وتكبر دايرة الأحزان
وتبقى طاحونه تطحنّي
أتوه فيا
واتوه منّي
وادوّر كل يوم عنّي
ألاقي مرايه مكسوره
وفيها الصوره مختلفه
أشوف نفسي بقيت خايفه
من الصوره اللي شايفاها
تجاعيد الوجع ظاهره
وشكل الحزن جوّاها
ونظره وجعني معناها
بتسألني على نفسي
ألملم بالأمل يأسي
واحاول أرسم البسمه
يتوه المعنى ف الكلمه
وتتبعتر حروفي دموع
أنا اللي دخلت ف
الممنوع
زرعت الحب ف الصحرا
ونوّرت الضلام بشموع
وكان طبعا جزاء قلبي
يعيش وسط البشر ..
موجوع
