المسحراتى...
فؤاد حداد
------
-------
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
وانا قلبى راضى
أنا قلبى رايق
أنا قلبى طايق
سبع طرايق
على الوريد
الأوله دى
عيون ولادى
صبح ميلادى
بتاريخ جديد
والتانيه ساير
تحت المناير
رمضان يناير
طالع سعيد
والتالته عينى
على البريد
بينك وبينى
سكه حديد
والرابعه داخ اللى
قلبه داخل لى
يبقى دا خلّى
بالأكيد
والخامسه أمسِى
فرش فى شمسى
أنا اللى همسى
صبح نشيد
والساتّه يومى
جميل فى قومى
أنا اللى صومى
وصلاتى عيد
والسابعه بشرى
من قبل بكره
على كل أكره
يبقى لى إيد
عصر العجايب
جايب مجايب
جايب ما جاب لي
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال
اصحى يانايم وحد الدايم
السعى للصوم خير من النوم
دي ليالى سمحه نجومها سبحه
اصحى يانايم يانايم اصحى
وحد الرزاق
