قصيدتي
(رمضان كريم)
زي النهارده من كل عام
يظهر قمرنا نبدأ صيام
وبذكر ربي الدنيا تحلي
وبتبقي احلي ويا القيام
*********************
وسط الشوارع
فوانيس كبيرة
وعلي المصانع اعلام وزينة
وناس بتاكل جوه الخيام
*******************
جوه الجوامع الناس تصلي
وناس تقولك ياعم خللي
وناس بتيجي علشان تنام
*********************
ومسحراتي يسهر ليلاتي
ينده علينا ويقول سلام
يحكي حكاوي يمدح نبينا
وبذكر طه يحلي الكلام
********************
جنب الكنافة نعمل قطايف
ناكل ونشبع ولا حد خايف
ولا عمر بينا بيكون خصام
********************
والفول تمللي ساكن قلوبنا
لو يوم هنبعد يجي يعاتبنا
والقدرة منه بتكون نصيبنا
ونعيش وبينا دايما غرام
********************
واللي يطلع فلوس كثيرة
حبة هدايا مع كام حصيرة
واللي يطير جوزين حمام
*********************
والكورة تحلي بعد الفطار
والليل ينور وسط الضلام
واللي بيصبر ويعدي يومه
خايف لينسي والناس تلومه
خايف يزعل منه المدام
*********************
يسهر محمد وجنبه مينا
القلب ابيض ومصر لينا
دايما بنكره اللي يعادينا
والوحدة فينا أكبر وسام
*********************
في بلدي
يبقي احلي الشهور
فيه الغلابة واقفين طابور
واللي في ايده شايل فطاره
واللي بيرجع ومعاه سحور
********************
واللي بيقرا قرأن وسنة
وسط الجوامع وبنبقي لمة
واللي يقابلنا بنضمه ضمه
واللي يولع عودين بخور
********************
رمضان كريم والله اكرم
كل سنة وكلكم طيبين
