😰 وأنا صغير 😰
مرزوق فرج
😰 وأنا صغير 😰
كنت شايف الدنيا وردة مفتحة
كنت اشوف الشمس صاحية
مصحصحة
كنت بلعب ع السواقي وفي
الغيطان
كان لي قلي برئ مليان
بالحنان
يحلي السهر ع المصطبة
علي ضي القمر
لما يهل في السما ويبان
والفرحة بينا قريبة
دار جيراني هي داري
غيط قرايبي هو غيطي
كل أمهات العزبة أمي
كل رجال القرية عمي
كل الشيوخ في الكفر
سيدي
كل البيوت مفتوحة
ولايوم إتقفلت بيبان
لو حد مات
الكل بيبات باكي وحزين
لو فيه فرح
الكل بيبارك وللفقير
الكل بيشارك
ويجود بحاجة تسعده
في يومه الجميل
.................
النهاردة الدنيا مالها
كل البيان إتقفلت
كل الغيطان إنقسمت
كل القلوب إتحجرت
حتي السواقي مابقلها
في الدنيا مكان
بيندفن في العصر ميت
وفي العشا بنسمع فرح
رقص وغني
علي أغاني المهرجان
ترتيل شيوخ في المضيفة
بيتلخبط مع صوت أغاني
في القاعة جنب المدرسة
الدنيا مالها مهرسة
كل شئ فينا إتقلب
الكره في قلوبنا غلب
بين الأخوة إتسطرت
ملايين حدود
الحب تاه بين البشر
والحقد حواليه إنتشر
شدو الطيور أصبح نواح
فوق الشجر
الود من تعبه إنتحر
................
بحلم أعود من تاني طفل
وأشوف سواقي تدور
واسمع غني
وأجرى ورا أبويا وهو
بيحصد زرعته
وأشوف صبية ملية زلعتها
من مية النيل السعيد
وأشوف ليالي الفرح
هلة تاني من بعيد
بحلم وأنا عارف
إن حلمي مش ممكن
يعود....بحلم
