عابدين أبو الخير
ضحكه حزينه
مكسوره وبتخافى تقولى
قدامهم إنك مكسوره
وكأن مشاعرك بتداري
الحزن وتضحك ف الصوره
وف وسط الضحكه المقهوره
بتلاقي تملي دموع بتبان
النص الفاضى ف كوبايتك
كان أكتر م النص
المليان
وغريبه أنتي ف أشواقك
موهوبه ف ترتيب الأحزان
وعجيبه أنها دايما ليها
تواريخ ومعاد
موهوبه إنك تخفى مشاعرك
وبكل عناد
سرحانه ف قلبك أحزانك
وكأن ليها سكن وبلاد
وشوارع زحمه ودوشه كتير
أصوات عصافير
على كام حاره
محشوره ف روحك صناره
تصطاد معاناتك ف الدنيا
وتزود من عندها معاناه
والقلب ساعتها
بيصرخ آآآه
الروح مسكينه ولا بتحكى
والبنت اللى تبطل تبكى
قلبها بيعيط من جواه
فسيبوها ف حالها
عشان تهدى
يمكن بعياطها يطيب
القلب
ويلاقى ف قلب دموعها
دواه
تخرج أحزانها من الصورة
ترجع ضحكتها الأصليه
من غير أحزان
وتحاكي قمرها ف وسط
سماه
والبسمه الصافيه تعود
ليها
والقلب ساعتها يقول
الله
عابدين أبو
الخير
#ضحكه_حزينه
#من_ديوان_ممرالقلب
