ألقيت هذه القصيدة في في عدد من الندوات والمهرجانات الأدبية وفي معرض القاهرة الدولي للكتاب عام 2000 م .
أهديها
إلي الأبطال من
شهدائنا في فلسطين الصامدون في وجه الغرور
( درّة )
لما المخاض يخلف وعوده
الألم يكسر حدوده
والأمومة تنتظر ساعة الممات
والأطبة والدّوا يتجمعوا
طب إيـــه يفيد ؟
ياااااا إيدين الجراحين
..........إنتوا فــين ؟
إحنا محناش حمل كاذب
إحنا فى رحم المهانة مخنوقين
إحنا من صلب الوطن
اللى انكتب له يبقى دمعة
.......فى عيون الزمن
إحنا بذرة نابتة.........
من دم الشهيد اللى اندفن
وبإرادته..........
فوق جسر الألم
يااااا .. مشرط الجراح
شق بطن الصمت فينا
شقشق الحلم ف عنينا
طير النووووووووم
من جفون ليلنا الجبان
رجّع المادنة القديمة
صوتها يعلا فى الأدان
انفض تراب العم سام
اللى خيم فوق شاتيلا
.........والخليل
لو هيفنا ألف جيل
راح تنبت الأرض الأصيلة
........ألف جيل
درّة يا زينة البلاد
شايفك بتضحك يا ولد
.... وسط الولاد
وروح القدس مرسومة
على جبينك !
تنده على جيلك
يااااا.. جيل اتولد شايب
حكم الزمن عايب
والهرم مقلوب
فين الرجال .. لما العيال
هيا اللى بتحارب
لأ ... دول مش عيال
دولا الرجال المولودين
علامة للساعة
شافوا الكبار المشغولين
بيربوا فى أرانب
تاكل فى عشب الوطن
صبح الوطن خارب
وخالى .......
غير م الأفاعى والعقارب
تسحب على بطنك
تلدغ حشاك
ملّينا من نوح الغراب
كفاية وطّـينا الرقاب
مليوووون إدانة
كفاية........
شبعنا شجب واستنكار
لما الكبار.......
دايسين على صدر الوطن
......... خنقوا النهار
يا دى الخراب........!!
شاطرينشى غير
فى شرب الغاب
لما ذهب الوطن
والعقل غاب
ياااا ميت ندامة م اتكسر
غصن الزتون
مين ييجى تانى يزرعه
آه يا صلاح الدين
دين الوطن فى غيابه
وغربته فى قلب المولودين
من صلب أصلابه
هيّا أكبر دين
الدم سال شلال
دبحوا النجاسة الحمام
..... زغلول
قبل ما يرفرف
جناحه فوق.....
مسرى الرسول
وآهى عيشة ناكل بالقفا
والعلفة فول
شبعنا قول
اللى بياكل بيتزا
..........ميّت
واللى بياكل المشّ
.......... ميّت
موتنا بكرامة
أشرف لنا ميت ألف مرّة
دى العيشة مرّة
لما خنـزير يعتلى
عرش المجرة
ياااااا ميت خسارة
........... يا دى المعرّة .
شعر/ حامد الغزالي يوسف
