زمن الشَّين
عزة راجح
اتعجب وابكي بدمع العين
لا انا عارفه انا مين .. ولا رايحه لفين
حواليه وحوش بوشوش ناعمين
مخنوقه ندهت .. يازمن الشين
ووقفت على الجسر استنى
نفسي اعرف بس اروح على فين
وده حالنا بجد ..
طب اسال مين ..؟!
في زمن ضلمه
لا فيه شايفه لا ناس ولا بني أدمين؟!
فعلا وبجد دا زمن الشين
زمن الشهوه ..
زمن اللي بيقعد ع القهوه ويبيع الحق بحجرين
بيقولوا عليه دا من الزاهدين
زمن اللي يبيع
زمن التطبيع
زمن الخاينين ..
واللي عليهم حتى الغاليين .. برخيص هاينين
زمن الاحباب تتباع بتراب
تتباع اعضاؤهم للكداب
ولا تفرق حتى الاسباب .. كل اللي يهم اننا ..
عايشين
زمن اللي بيلعبوا بالكلمه
زمن اللي يطبل ويزمر
واللي على الحلوه .. بيتنمَّر
ولا عنده لا تقوى .. ولا دين
وان شاف غيره منه اتذمر ..
للحق وللخير هيعين .. بيقول دا اعمى وم الضالين
زمن النجسين .. قاعدين بأذاهم ع القمه ..
وبينهشوا لحم الطاهرين
زمن الانطاع .. بقوا فيه ماسكين ..
بخيوط الحق .. وله سايقين
بيحركوا فيه لشمال ويمين
وان ثار واتمرد بيمدوه وعلى الرجلين
وبيخلعوا قلبه وباديهم ..
يقلعوا من
وشه عنيه الاتنين
زمن المعاتيه المجانين .. اتكرموا وخدوا
النياشين
زمن الشيَاطين سادوا وبادوا كل الصالحين
واتمكنوا م الخير بالقوه
والحق باعوه أدام العين
زمن المختال المحتال وبتوع الزفه الكدابه
فلا فارس فيه ولا خيَّال
ده زمن الشين
ده زمن العيب
لا فيه وصل بحب ولا في حبيب
بقى فيه الحق ف زاويه غريب
فازاي هنعيش فيه زمن العيب
زمن الشيَاطين
ازاي هنعيش ف زمن عايب ملعون م القلب
هو اللي بيحصل يرضي الرب ؟!
والله تعبنا وفيه ماشيين
مااحنش داريين على فين رايحين
فاعدلها يارب وعينا عليه
عين الطيب
عين المسكين
عين العارفين الصالحين
واللي قلوبهم بالخير عايشين
املاها يارب بنور ويقين
دعوه اقبلها يا مجيب يا معين
اقبلها يارب
يارب .. آمين
اصدقائي انا لا ألعن الدهر انما هؤاء الذين
اضطرونا لان ننعته بهكذا صفات .. فتبا لهم
محبتي واحتراماتي
عزة راجح
