محمود نوحو ابراهيم
عطبت روحي مناطرة...... :
أطرز شليل الليل
بنجومْ السهر
وأسامر
بدمعي طواريك
گمر
وشگد ثچيل
الليل بغياب النحبهم
وشگد حزين المطر
ولهفة المشتاگ
للمحبوب
تگليبة جمر
وأنت عالي
وجثير عليت
للهجران حيطان
الحنين
وسييست بهوج بحره
كل فرح ذيج السنين
وتوهيت
دموع فرحي بيك
لمناطر سفن
علمت شرعانها
تلوي الريح
تجفي و ماتحن
وعطبت
شباك روحي مناطره
توهتْ شراعك
لو يحن
لو يمر بطيف مزنة
صيف
لو مرحبة ماشي يمن
ليش
طبعك ياصلف
كلش ثجيل وكلف
وماتنحزر دگات وماتنوصف
ليش جوتيت الليل
بدموع المخدات
اللي تون
مناطره لو بصيصة
طيف
لخاطر المشتاگ
تحسبها لله
وتحن
بحساب عطوة
لوزكاة عمرك ال ورّد
حسن
وخدك الماجستا
دموع المحن
وعينك المشطوره غرافين
غيم ومزن
ياحلو
ومن كثرماانت
حلو
چنك عتيج الخمر
وهيل مدگوك بجرن
ياصعب
وبطول شمس الصيف
ومعناد
سراب
ليش تطوي الروح
بردية
وتكتب حنين
الاه مرسوم لعذاب
مااصدگ
من شين طبعك
يحلى لگليبي الغياب
وناطيريتك
اول عن اول
جثير ناطريتك
جنك بحسبة
وحي
شيلتني مغامز الشمات
وشلت وسفاتي وأجيتك
شايل بگلبي
حنين الموج لشراع السفن
بس ياغريب الطباع
ناسيني لگيتك
بالهواجس
والوسواس
بالجذب
وناطيرتك
أمكابر الشمات والدمعات
والأهات
بكلهن ناطريتك
وعناوين قهري والحزن
زهملتهن لباب بيتك
ايه... يااني
ياحزن كل الكواغت
من يذوّب حبرها
مخازر بحر
وتننسى بوحشة جزر
على الشواطي
وتنترس كلماتها
حزن وسهر
ايه... يااني
يامعاتب نهر
تملت جروفا حنين
وجروح وقهر
ومانكر
جال ونفر
