خارج التصنيف
كلمات مرفت جابر
على إيدك ..
بدأ يومي يصحّيني
وانا المتعوّده دايما
أنام جوّاه وأصحا معاه
وفوق صدرك بدأت احبو
وف عيونك ..
بدأت حياه
وبعد العمر دا كلُّه
باشوف نفسي ..
أقول الله
عشان دايما باكون أجمل
من اليوم اللي فات
بكتير
بدون كحله
بدون بودره
بدون ماكياج
غرامك يشبه الإنعاش
يفوّق كل شئ بشويش
ولو ميّت ف لحظه يعيش
ولو عايش يعيش أكتر
ولو شجر الخريف زاره
معاك ف ثواني بيخضّر
وورد الدنيا يتعطّر
بعطرك لو تفوت جنبه
ولا يدبلش ويّا خريف
ماهو انت ربيع هنا دايم
ومش محتاج كمان تعريف
دفا ييجي ف عز البرد
ونسمه تفوت ف حر الصيف
ولو سألوني ع الأشواق
ح اقول دايما هواك
ترياق
واقول من غير خجل منّي
غرامك ..
خارج التصنيف
ولو حتّى يكون تخاطيف
بينعش كل شئ دبلان
ولو نايم بيصحا أوام
ولو صبّار يكون سكّر
فيبقى طبيعي أتفرّج
على شكلي وأتحيّر
واشوف نفسي قُصاد نفسي
ف كل دقيقه باتغيّر
باكون أحلا من التانيه
ودق القلب من إسمك
يعدّي الميّه ف الثانيه
يعدّي متين
يعدّي الألف
ويفضل ف العدد بيلف
م انا الألفه ف بنات
كوني
وكل الناس ف أخر الصف
وانا اللي كسبت تاج
قلبك
فيبقى أكيد أنا الملكه
ولك وحدك غرام قلبي
محال لحظه يكون شركه
مدام قلبك صبح عرشي
ح افرّق ع الجميع بركه
وح ازرع ورد ف السكّه
من امبارح لبكره الجاي
و ح ارسم ع الشجر قلبين
وبينهم تقسيمات الناي
و ح اكتب حرف من إسمك
بيحضن حرف من إسمي
واشوفك جي وأسمّي
وأرقيك من عيون الناس
بسورة الناس
وبالإخلاص
واقولك يا حبيبي خلاص
مافيش حاجه ح تبعدنا
ولا ظروفنا
ولا الأيام
ولا المخاليق
ح انام واصحا وابل
الريق
على إسمك
على صورتك
على حبّي
وح اشكر ع النعيم ربي
وح ادعيلك يطول عمرك
أكون شمسك
واكون قمرك
واكون بعد السهر فجرك
ولو أيامنا عاندتنا
ح اخلّي الدنيا تضحكلك
أنام واصحا على صدرك
واغنيلك بصوت ثومه
بصوت شاديه
بصوت فايزه
م انا اللي بحبك
الفايزه
وطول م غرامك الجايزة
ح اكون ملكه على العالم
من امبارح ..
لبكره الجاي
