أخدت تاري
كلمات مرفت جابر
.............
قد أيه جوّاك بشاعه
بتداريها ف كل موقف
كل يوم عن يوم بتظهر
كل يوم توعد وتخلف
كل يوم باعرف حكايه
وامّا اواجهك بيها تحلف
وامّا تعمل حاجه واعرف
يبقى كدب الكون ف عينك
وانت بتحاول تبرر
يبقى طعم البحر مالح
وانت تحلف إنّه سكّر
كل كدبه بكدبه اكبر
والنتيجه المُر زاد
ألف سد بنيته لمّا
صار ما بنّا كتير بلاد
رغم نفس مكانّا هوّ
والمكان دايما جامعنا
أتبدر ع الأرض شوقي
وف حصاد الحب جوعنا
وامّا ضيعنا ..
جيت بتعمل ألف حجّه
والحجج بالكدب ظاهره
ليه بتهرب م الصراحه ؟
ل
دانت باللي عملته أدرى
غش .. كدب
وغدر واضح
وامّا اسامح
ألقى طبعك هوّ طبعك
كل ساعه تمد برّه
كل ضحكه بين عيوني
بيك بتبقى دمعه مُرّه
نجمتين ف عيوني دابوا
من عذاب قلبي ودموعي
ما التقوش م الحب نظره
وانت دايما مهما يجرى
كل همّك هوّ نفسك
بكره مش أبدا بتاعك
طول ما يومك زي أمسك
قلبي كان بستان محبّه
حتى كان يسكر بنَفَسَك
النهارده مش مسامحك
بعد صدّك
بعد هجرك
بعد جرحك وانهياري
فيه حساب لازم تحاسبه
قبل ما تبيع قلب شاري
هات سنين ضاعت عليّا
قبل ما تغيّر مساري
هات ورود ف ربيعي دبلت
من خريف مش باختياري
لازم المح دمع قلبك
مهما ح تحاول تداري
لازم اقسى عليك واذلّك
أو تدوق من صهد ناري
يومها بس ح اقولك امشي
واعرف انّي ...
أخدت تاري
أكتب تعليق