ألبوم ذكريات
حامد حبيب
بَقَلَّب ألبوم الذكريات وانا سارح
واحنِّلِك صورة
وصوت وملامح
واقول فينك
ياسِتّ الكُلّ ياغالية
ياريت تيجى وتاخدينى
على امبارح
لِضِلِّةْ قلبِك
المفتوح ....... تضُمّينى
وتاخدى قلبى ده
المجروح تداوينى
مابين نخلِك وبين
زرعك وأحضانك
وبين شطِّك
تشيلينى يانور عينى
دانا باحلم
بِحِتِّة خُصّ بين شجرِك
وطير سارِح
كما امبارِح حوالينى
بَقيتى مكَشّرة ف وشِّى
وانا العاشِق
وانا طول
عمرى باكتِبلِك مواويلى
وكنتى تُقعُدى
جنبى كما ......أُمى
تِحِنِّى عليَّه
واحكيلِك .... وتحكيلى
فإيه دلوقتى بقى
حاصل ياغِنيوتى
هجرتينى ، وليه
غيّرتى ف سنينك
دانا طيّب...دانا إبنك ......دانا عمرى
وعهد الله مايوم
فكَّرت فى غيرِك
وليه يا حبيبتى
مَفضلشى بقى منّك
سوى ذكرى وكام
صورة فى ألبومِك
_______________
حامد حبيب_مصر
***********************
***********************
