بركات علي
دلوقتي حزين بسبب ناس 
كنت لحزنى بأشكى لهم
يصيبنى فرح أجرى عليهم وأحكى لهم
يصيبنى حزن أفضفض ليهم وأبكى لهم
دلوقتي سابونى وحيد
ولا عارف لغيرهم أروح
وكانوا هم الروح
والروح ما كانت تعرف غير ليهم تبوح
تحكى فرحها
وتشكى همها وتنوح
ومعاهم عرفت الطير
وبوجودهم طلع لى جناح
جم فى الأخر
قصوا لى ريشى
وسابونى لحزنى متاح
إللى كانوا فى يوم بيطيبوا جرحى
دلوقتي بقوا هم سبب الجراح
ولما تعبت من جرحهم
هجرت عشهم وغادرت
دول إللى كنت ليهم وفى
وعمرى فى يوم بيهم ما غدرت
نذرت ليهم الفرح
وعمرى لجرحهم ما نذرت
وأنا كان جرحى عندهم من البداية منذور
حكموا عليا بالهجر
وأنى أعيش باقى عمرى مكسور
أعيش حزنى وحدى
وفرحى يدوب أبص عليه
من ورا سور
أنا إللى عمرى
بضر ما ضريتهم
دلوقتى أنا بسببهم مضرور
ولو يوم جرحى زاد وصرخت
يقولوا أدى إللى علمناه القوة
علينا بيثور
عايزيننى أكون دايما فى الضلمة
ولا أحلمش يوم بالنور
منعوا الفرح عنى
ورصوا لى الحزن طابور
بقيت عايش ما بينهم مذلول
ولا عارف أمتى معاهم حزنى هيزول
والفرح من تانى ييجى ويزور
ومن تانى أطرح
وأودع أيام الذبول
ولا هأعيش باقى عمرى كده
وأموت بجرحى مقتول
وياترا فى جنازتى هيقولوا قتلناه
ولا مات من الفرح معلول
وياترا هيودعونى بالصراخ
ولا هيدقوا على موتى طبول
ما أنا بردو إللى ميت بالفرح معلول
#الغدر
#بركات_على
