مرفت جابر
عيش مع موتك
كلمات مرفت جابر
.........
.........
لأ مش كوره القلب تشوطها
لأ مش سلعه عشان يتباع
عيش أيام عمرك على راحتك
خلّي هواك للكل مشاع
عيش جبروتك لكن حاذر
طعنة غدر من الأتباع
أمّا انا قلبي ماهوش طمّاع
ولا محتاج من حبك شئ
ساذجه وفاكره ان انت برئ
بس لقيتك ظالم جاني
بالطيبه القلب اترجاني
جيتلك شوفت الذُل ف أرضك
شوفت الضلمه اللي ف أركانك
طولك يشبه دايما عرضك
غدر الدنيا بحالها ف طبعك
والكدب سريرك وغطاك
حتى مافيش إحساس خلاك
تندم وتبطّل جبروتك
غاوي تلم قلوب تعبانه
حاشيه عشان تبقى ف ملكوتك
عيش انما ح تعيش مع موتك
صوره كئيبه وقلب جبان
أنا ح ارفع راية العِصيان
وح تطلع مهزوم ف حروبي
مش ح تشوف ولا طرطوف توبي
علشان مش قلبي اللي تبيعه
لسّه مازال ف العمر ربيعُه
بس عليك رح يبقى خريف
دوق البرد ف عز الصيف
شوف الضلمه ف عز نهار
صرحك من بعدي ح ينهار
جبروتك رح يصبح ذل
عندك كل ميزان اختل
إنما عندي ميزان معدول
إعطش لكن مش ح تطول
نقطة ميّة ف نهر حناني
مجني عليّا وكنت الجاني
كنت الغدّار والغشاش
شوفتك قولت حرير ولقيتك
حتّى ما حصّلتش للشاش
عايش ميّت
ميّت عايش
قلبك محتاج للإنعاش
أو أكتر طبعا..
إن عاش
