نقطة هجوم
كلمات مرفت جابر
..............
بكره مش زي اللي فات
يعني مش ح اصبر عليك
دمع عيني اللي بإيديك
بوّش الجوابات بحالها
لون سواد الحبر جالها
خلّى كل حروفها تلبس
ع السطور لبس الحداد
نار دموع الحزن نزلت
ع الورق بقى كوم رماد
حتى ورد الحسن مات
رغم لسّه السقّا حي
مش ح اسيب بكره اللي جي
يرتكب نفس الخطيئه
عندي ميت مليون طريقه
أحمي نفسي بيها منّك
من جمودك
من برودك
واللا جبروتك وعِندك
يعني أبدا مش ح اكونلك
جاريه من ضمن الجواري
مش ح اسلّم صك قلبي
للي يعمل فيها شاري
والحقيقه هوّ بايع
ع الرفوف رُص البضايع
بس قلبي مش بضاعه
قلبي خد فعلا مناعه
ضد صدماتك وغدرك
مش ح اكون ف الضلمه بدرك
مش ح اكون ف الشمس ضِل
دانت قلبك تاه وضَل
حتى عن شوف الحقيقه
طول حياتك وانت دايس
حتى أحاسيسي البريئه
عندي ميت مليون طريقه
أحمي نفسي بيها واعمل
م الدفاع نقطة هجوم
مش ح اسيبلك أي راحه
أو مساحه تلاقي نوم
طيفي رح يفضل يطاردك
يملا قلبك بالهموم
ذنبك اللي ف يوم جنيته
رح يعاقبك كل يوم
كُلّه كوم والجي كوم
مش رح اقبل بالهزيمه
هوّ وقت وليس إلا
وانتصاري عليك مؤكد
كل فايت كان مؤقت
زادني عبره وزادني قوّه
رد فعلي ح يبقى نوّه
تقتلع أبراج غرورك
من جذورها تجيبها أرض
رح تحس الحر برد
رح تلاقي البرد نار
كل يوم تلقى انهيار
لمّا تتحول مافيش
وان حاولت ف يوم تعيش
رح تعيش ف الضِل هامش
أو تعيش ..
من غير حياه
