محمد حبشي
وقعنا ف غرام ، ابن الحرام ..
فجأة انقلب ،
وقال
سكوت ..
قلنا تمام ، إنت الإمام ،
وما حد فينا طلعلوا صوت ..
و صَفَا انتباه ، وشمال يمين ،
كَتِفَاً سلاح ،
كل الجواري خدامين ،
حاملين سِفاح ..
كل العبيد ، غَنُّوا النشيد ،
وفي الحواري
رددوه ..
بنوا صنم ، زي الغنم ،
ليه يعبدوه ؟..
مع إنه مش عجل دهب ،
وموسى خلاص وَلَّى وذهب ..
يمكن عشان
فرعونهم الجديد ،
واخد نيشان ،
عزمه شديد ، قلبه حديد ،
وطريقه مليان عَسَس ،
ب يعِدُّوا أنفاس
الجثث ..
خطوة أي قط ولو أليف ،
عصفور لطيف
صديق حليف ،
كلمة من كلب رايح ، ولَّا جَاي ،
شايل
في قلبه ،
سايل دمه حَي ..
راسم في قبره حلم مات ،
فوق جبين الأمهات ..
طريق مليان
خَفَر ،
للي عَبَد ، واللي كَفَر ..
ميدان مليان عيون بوليس ،
طول الزمان عَمَّال
يقيس ،
درجة مرارة مَن قَمَع ،
درجة حرارة
المجتمع ،
عمق مغارة العريس ..
نبض السكوت ، سُمك الحيطان ،
لو حَد وَزُّه
ف يوم شيطان ،
خلف الشوارع والغيطان ،
وطلِعْلُه فجأة مرة
صوت ،
من لندن حتى أو باريس ،
أو شَخَرَة
ساعة مَنظَرَة ،
ب استوديو جوة أنقرة ،
تجرح مشاعر عنترة ..
فما تخافوش ،
إحنا
الوحوش ،
حاسبين ب ورقة ومسطرة ،
إزاي نعالج ب الجيوش ،
في كل ركن
المسخرة ،
عايشين سنين نبني
ف تابوت ،
في كل قرية مقبرة ،
أي سجين ممكن يموت ،
ب كلمة كبيرة
صغيرة ،
ما هو كله تحت السيطرة ..
محمد حبشي / مصر ..
