حامد حبيب
أسراب حمام
اسراب حمام
فوق سطوح الحلم عندى
تبتسملى بالسلام
من هديلها
حبر قلمى
فى القصيدة وفى الكلام
الف معنَى من هديلها
يحتوينى امّا آجى انام
وامّا باصحَى القى النهار
فى البُرج واقف فى انتظار
يحضُنّى واكتِب
الف غنوة فى النهار
بَعشق حمام الحلم
بعشَق غنوته
كاتبنى لسّه فى الحياة
حاططنى لسّه ف سكّتُه
اصل اللّى فاضل فى الحياة
أحلام بتكتبنا نغم
تلهمنا صورة فى الحياة
تنقذنا من دنيا العدَم
نكتب قصايد فى الشطوط
نكتب قصايد فى الشَّجَر
احسن مانصحى نقوم نموت
مابين حروف حبلى بضجَر
!!!!!!!!!!!!!
ياحلم مادِد للسّما إيد الرّجا
إيّاك تموت
خلّيك ورفرف فى السّما
وحُطّ فوق سطح البيوت
إنت اللّى فاضل للجروح
اللى بكت عمر الضياع
إنت اللى فاضل للدموع
اللّى اشتكت كُتر الوداع
شارك حمامك فى القصيد
وانسى اللى كان
هناك فى عشّه دنيتك
هتكون أمان
واعزف هديل
واعزف قوافى بهجتك
مادام الدنيا جاهلة بمحنتك
رفرف وطير
وانسى قسوة دنيتك
!!!!! !!!!!
!!!!!!!!!!!
