محمد حبشي
كان فاضل دَقَّة ،
وحبي ف قلبِك يترَقَّى ،
واجلس على عرشِك ،
وابقى أمير ..
زي الجندي ما يبقى وزير ..
كان فاضل فَرض ،
ويطلع قلبي للسما م الأرض ..
ويخُش ب دون جناحات الجنة ،
بعد ما قلبِك
يتحَنَّى ،
ويزرع صبري جناين ورد ..
ويتمَشَّى نبض صوابعي ما بين نهدين ..
كان فاضل دين ..
يتسدد للفَم قبل ما اموت ..
طعم فانيليا ف باكو بسكوت ..
دُقتُوا في شفايفِك
أثناء البوسة ، وآهة قلبك محبوسة ،
ولحد الآن
ما دفعتش تمنه ،
ل فمِّك أو فمِّي ،
مع إن ريحته لسه ف دَمِّي ..
وفُتَاتُه زي النمل ،
ب يجري خلف شفايفي على الخَدِّين ..
كان فاضل هزة ،
ولحمي ب دمِّك يتغذَّى ،
ونطفي جمر النار ب عودين كبريت ..
كان فاضل لمسة ، ب صوابعي الخمسة ،
ويخرج م المصباح عفريت ..
كان فاضل ناي ،
يحكي واحنا ب نشرب شاي ،
للموج حواديت ..
كان فاضل ( تووت ) ، والقطر يعَدي ،
من غير ما يهَدي ، والعمر يفوت ..
كان
فاضل لفة ،
وتنقلب الدفة ،
وف بطن الحوت ، أحلامنا تموت ..
محمد حبشي / مصر ..
( 15 - 5 - 21/2022 ) — 3:30 صباحاً ..
