مرفت جابر
ما تستنّاش
كلمات مرفت جابر
....
ما تستنّاش نهار يطلع
وبين عينك بواقي دموع
ما تستنّاش إيدين غيرك
تطبطب قلبك الموجوع
ما تفردشش الخطاوي بعيد
وتدخل سكّة الممنوع
ما زال لسّه الأمل موجود
وصوت قلبك مازال مسموع
ولو قلبك يحس بجوع
فسيبه يحب كل الناس
وسيبه يلم كل النور
ويزرع ف الشوارع خير
دا لسّه الدنيا فيها كتير
ولسّه العمر ما خلصشي
على ضي النجوم إمشي
وهد الليل بنور شمعه
بلاش تسمح لدي الدمعه
تغطّي الشوف على عيونك
بإيدك يتعدل كونك
بعزمك تتعدل كفّه
ف حاول تجمع الأحلام
وتدخل فيها تتدفّى
وإوعى بقوّه تستعفى
وإوعى ف ضعف تستضعف
وسيب قلبك يعيش تسابيح
وروحك ف السما ترفرف
وسامح وارحم المسكين
وكون ويّا الفقير أعطف
دي دنيا الرحمه لو تعرف
بتصبح حتّه م الجنّه
عليك ف الجنّه تتمنّى
ح تلقى الأمنيات حاضره
بلاش تكسر دراع بكره
بنظرة يأس ف امبارح
أكيد بكره الشجر طارح
ومستنّي تقابله بحُب
عشان حتى الحمام يرجع
على كفوفك يلاقي الحَب
ف سيب لحن الأمل يعزف
بطعم النور نشيد ف القلب
وقول بالقلب تاني يارب
ح تلقى ان شالله ف الصحرا
جناين ورد
ديوان خليك انسان
