عزة راجح
آسفين صحيح
عزة راجح
بالله عليك احلف لنا
إن انت واحد مننا
وان انت شايل همنا
وان انت حاسس بالوجع
اللي غرسته ف قلبنا
احلف يا آخرة صبرنا
احلف اكيد هنصدقك
ما الفعل شوفناه كلنا
بس انت ناسي ان ف اديك
لسه ما جفش دمنا
آسفين صحيح
ازاي نقول احلف لنا
وانت الأمين
الراعي لخيوط حلمنا
انت اللي قلنا ف يوم عليك
باديك هيضحك حظنا
جاحدين صحيح ..
ازاي بننكر نعمتك
واحنا الكلاب
اللي بناكل لقمتك
و لحمتك
ومدفيانا هِدمِتك
واللي بخالص رحمتك
وحكمتك
قبلت نبقى ف جنتك
وبالهوا بتمدنا
جاحدين صحيح ..
اسفين يا راعي المحرومين
احنا حقيقي مجرمين
وطماعين
وغدارين
ظالمين مروءتك والكرم
لكن حقيقي بنعتذر
فاقبل وسامح جهلنا
إيدك نبوسها وجزمتك
بلاش خلاص تحلف لنا
دا كفايه طلة حضرتك
تحيي قلوبنا وحلمنا
وان جوعنا ..
من نظرة عنيك
نشبع و تِحمد بطننا
اسفين يا راعي المحرومين
بادينا سلمنا الزمام
وخلاص بقينا نقول تمام
انت الملك على عرشنا
فاحكم وبيِّن قوتك
سلمنا لله أمرنا
