كلمات مرفت جابر
أربع جدران
..............
محبوسه مابين ..
أربع كلمات
أربع مسارات
أربع جدران
الصبر ماهوش ف القهر جميل
والصمت ف بحر الأهه جبان
والحزن الفارد ألف جناح
مع وقت ما يعرفش الإحسان
وف عز ما كُنت عشانك نور
بتكونلي ضلام
وتكونلي ألام
وتكون السجن مع السجّان
محبوس القلب ورا القضبان
محبوسه الدمعه ف نن العين
وبتنزف ف الشرايين فيضان
والروح مش لاقيه بصيص للنور
ف ازاي ح تلاقي ف ضلمه أمان ؟
لو كان جوّاك فعلا إنسان
ح تقرّب من قلبي وتسمع
وتشوف الدق اللي بيوجع
إزاي جوّايا بيرمي أنين
ح تشوف شلال من دمع العين
ما ظهرش قُصادك لحظه عشان
كان دايما يحدف ف الشرايين
م انا عِزّة نفسي بتمنعني
أتدارى ورا الدمع الظاهر
ودموعي بتتدارى لجوّه
إنما ف نهاية كل طريق
تتحوّل إعصار أو نوّه
ف يا أدم حاذر من حوّا
واتعلّم إزاي تعاملها
وتحاجي عليها بكل حنان
د الجرح ما يعرفش الغفران
وانا جرحي مداه على مدد الشوف
مش ح اقبل حجّه بأي ظروف
ولا ح اقبل أدخل بحر الذُل
يا تكونلي ف لحظه جناين فُل
يا تروح لبعيد
وان ح اكسر ف القلب التنهيد
و ح ادوس ع الجرح وع الأحزان
أنا قادره أجيب من خوفي أمان
إنما من بعد ما اهد حاجات
واتغلّب ..
ع الأربع جدران
.........................
....................
