الرئيسية أدب صلاح جاد سلام قصة الإبدااااااااااع فى وجع الدمااااااااااغ

أدبصلاح جاد سلامقصة

الإبدااااااااااع فى وجع الدمااااااااااغ

فريق ألفا تيم

A+ A-

facebook twitter

  الإبدااااااااااع فى وجع الدمااااااااااغ

من أحاديث النفس :

 

من مصنّف لى بعنوان [[ قصص وأقاصيص ]] أقتطف للقارىء الكريم ما يأتى :

 

[[ الإبدااااااااااع فى وجع الدمااااااااااغ ]] :

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

أقولك إيه ، وأعيدلك إيه :

 

الحاج عمران أخو الحاج رمضان ، والحاج زيدان ، والحاج السمان ، والحاج صفوان ، والحاج سعفان ، والحاج رشوان ، والحاج حسان ، والحاج نعمان ، والحاج سعدان ، والحاج حمدان ، والحاج قمصان ، والحاج رضوان ، والحاج سليمان ، والحاج عرفان ، والحاج جبران ، والحاج سلمان ، والحاج عسران ، والحاج زهران ، والحاج عثمان ، والحاج مهران ، والحاج طولان ، والحاج شعلان ، والحاج رسلان ، والحاج عدنان ، والحاج زيان ، والحاج شعبان ، والحاج مروان ، والحاج برهان ، والحاج ريحان ، والحاج غسان ، والحاج عنان ، والحاج ريان ، والحاج مرجان ، والحاج سمعان ، والحاج عطوان ، والحاج سلطان ، والحاج فرحان ، والحاج عتمان ، والحاج رشدان ، والحاج سويدان ، والحاج شومان ، والحاج علوان ، والحاج شوشان ، والحاج جمعان ، والحاج سرحان ، والحاج كنعان ، والحاج سفيان ،

 

ما تزهقش من كتر الأسامى اللى آخرها الألف والنون ،

 

أصل الراجل ابوهم كان بيحبها قوى ومغرم بيها قوى ، وخلف يجى أكتر من 30 راجل وست ، وسماهم بالأسامى دى ، اللى آخرها الألف والنون ،،

 

وكلهم حجوا ما عدا سبعة تمنية خدوا لقب الحج بالشفعة ،،

 

ما طوّلش عليك المسيّر ،، قول طوّل ،،،،،،،،

 

أبوهم الحاج بدران دا كان راجل كييف يتجوز كتير ، وما يتجوز إلا اللى آخر اسمها الألف والنون ،،،

 

واحدة اسمها أسمهان ، وواحدة اسمها ناريمان ، والتالتة اسمها إحسان ، والرابعة اسمها نجوان ، ودى كان بيعشقها عشق ما له مثيل ،، ليه ،،،، ؟

 

لأن بنت عمها اسمها كريمان ، وبنت خالتها اسمها إيمان ، وبنت عمتها اسمها جيهان ، وبنت خالها اسمها حنان ، وبنت جارتهم اسمها روان ، وجارتهم التانية اسمها أشجان ، والتالتة اسمها نوران ، والرابعة اسمها وجدان ، والخامسة اسمها سلوان ، والسادسة اسمها جيلان ، والسابعة اسمها شكران ،،

 

وآخر الشارع بتاعهم فى محل ألبان اسمه امتنان ، والمنطقة اسمها بستان الميدان ،،،،،،،،،،،،

 

احنا كنا بنقول فى إيه يا بو العم ، لحسن أنا مستعجل ، ووراى مشوار مهم قوى ،،،،

 

أصل أنا رايح لجماعة مسافرين ، أقابلهم على محطة القطر ، علشان كانوا طلبوا منى شوية ورق ياخدوها معاهم للمحامى اللى موقف القضية بتاعتهم عليها ،،

 

هى قضية أحوال شخصية ،، وفيها شوية مواريث مشبكة حبتين .

 

قال إيه ،،، كل ما يروحوا عنده يقولهم القضية اتأجلت ، وفى كل مرة يلهف منهم شي وشوية ،،

 

حكم هو محامى مادى قوى ، وبيحب الفلوس أكتر من أبو اللى يعرفوه ،،

 

وأنا قلتلهم كذا مرة ،، سيبكم من المحامى الطماع دا ، وتعالوا أوديكم لواحد محامى معرفة ، زى السكر ، وشاطر قوى ، ما يدخل فى قضية إلا ويكسبها ،،

 

يا راجل ،، المرة من دول يرفعلها دعوى خلع ، يكسبها من تانى جلسة ، وان طولت يبقى التالتة تابتة ، وعشان كدا زباينه كلاتهم حريم ،،

 

أنا الصراحة استغربت من كتر الشطارة بتاعته ،، وسألته فى يوم واحنا قاعدين على قهوة فى العتبة ، فى شارع جانبى هادى شوية ،

 

كنت يومها رايح اشترى حتة قماش صوف سلكا ، عشان أفصلها عند الاسطى شكرى ، أحسن ترزى شفته وسمعت عنه فى حياتى ،،

 

وأنا ماشى لقيت اللى بينادى عليا ،، وحلف ميت يمين لازم تتفضل ،،

 

لما قعدت معاه ، وشربنا الشاى ،، سألته : كيف يا متر بتكسب القضايا دى كلها ، وبالذات قضايا الخلع والطلاق ؟ ،،

 

بصلى وقالى : الصراحة أنا اتعلمتها فى اخواتى البنات ، كانوا ستة ،، كلهم طلقتهم من جوازهم ،،

 

وكمان اشتغلت على الجيران فى العمارة اللى قصادنا ،، وبعدين اتوسعت فى كذا مكان ،،

 

صحيح أنا كنت باشتغل كتير ببلاش ، وأحيانا شكك على ما تفرج ، لكن حاليا بطلت الكلام دا خالص ، وساعات بآخد تلتين أتعابى مقدم ،،

 

وآخر المتم قاللى : أنا ولا فخر مطلق نص نسوان البلد بتاعتنا ،، والمرة من دول لو جوزها زعلها فى أيتها حاجة ، بتهدده بيا ،، يتعدل على طول ،

 

ما هى بعيد عنك رجالة آخر زمن ،،

 

ولو ان الكلام دا وقف حال ليا ، لكن أنا مش ساكت ، بأغيب وأروح كذا بلد جنب بلدنا ، وباعمل ندوات ومحاضرات كتير ، والعنوان جذاب ،،، [[ حقوق المرأة الضائعة بيد الرجل ]] ،،

 

خدت بالك من العنوان ،،،

 

أنا منقيه نقاوة ما تخرش المية ،،،

 

وطبعا انت سيد العرافين ،،،

 

دول كتير منهم مخهم طاقق ، بيصدقوا ما يسمعوا جملة حقوق المرأة ،،،

 

والمرة من دول يا مولانا تحضر الندوة من هنا ، ما تكمل شهر إلا وتجينى أرفعلها قضية على جوزها .

 

الصراحة هو محامى شاطر خالص مالص ، وأى واحد معاه قضية معفرتاه يروحله ،، حيكسبها ،،

 

اللى خلاه خرب بيوت الناس دى كلها ، أكيد حيكسب أى قضية مهما كانت .

 

خلينا نكمل الموضوع بكرة بعد صلاة العصر ،،

 

أهو نسهر سوا مع بعض ،،

 

حكم النوم الأيام دى بقى عزيز قوى ،،

 

يا راجل ،،، لا نافع مراوح ، ولا نافع لا تكييف ،،،

 

الجو نار ، والخلقات نار ، والفرشة نار ، والحيطان بتبخ نار ،،،

 

أعوذ بالله من النار و من عذاب النار ،،

 

أدينا بنقولوا يا رب سهل على بقية الأيام اللى جاية دى و الصيف والحر يخلص ، عشان تدخل الشتا التمام ،،

 

ياخى أنا باحب الشتا قوى ، واقعد حضرتك قول قوى ،، وكمان قول قوى ، وكمان تانى قول قوى ، لحد ما حضرتك تنسى أنت بتقول ليه قوى ،،

 

الو ، الو ،،،، ايوه ،، مين معاى ؟

 

،،،،،،،،،،

 

آه ،،،،،، انتو ركبتوا القطر خلاص ؟

 

،،،،،،،،،،

 

يا راجل ،،، وقام بيكم كمان ؟

 

من غير يمين ، أنا كنت جاى المحطة عشان الورقات اللى انتو طالبينهم ،،

 

وعموما ،،، أنا كنت جاى أسلم عليكم بس ، لا أكثر ولا أقل ،، لأن الورق اللى انتو طلبتوه قالوا لازم تروح تطلعه من دار المحفوظات فى حتة اسمها القلعة ،،

 

وأنا يابو العم عمرى ما رحت دار المحفوظات دى ، ولا أعرفها فين ،،

 

وسألت جماعة معرفة بيقعدوا معانا عالمصطبة كل عشية ، ما فى ولا واحد راحها ،،

 

والحاج مرسال أبو الطافش قال هى قريبة قوى من ميدان السيدة عيشة ،، يعنى فركة كعب ،،

 

واتفقنا مع بعض نصلوا الجمعة الجاية فى السيدة عيشة ، وبعد الصلا نسأل فين دار المحفوظات ،،

 

الو ،،، الو ،،، الو ،،،،

 

تصدق يا راجل يا طيب ،، انت حظك حلو ، أهى السكة اتقفلت ،، والمصطبة حتتآنس بيك الليلة دى يا باشا . آهــــــ

 

ــــــــــــــــــ

 

انتهى موجز الجزء التمهيدى من حديث ذلك الرجل الطيب ، القادم من هناكهاييتى ،،،

بدءًا بالتقديم ثم المقدمة ثم التمهيد ثم الفصل الأول إلى الفصل المائة من الباب الأول إلى الباب المائة ، فى الجزء الأول  ، إلى الجزء المائة ، من المجلد الأول ،، ثم يتبعه المجلد الثانى بأجزائه وأبوابه وفصوله إلى ما شاء الله من مجلدات متوالية ،، طالما فى العمر زفير وشهيق وبقية . .

ولو جلست إليه ليلتين كاملتين بتمامهما ، فلن تخرج بجملة تفيدك فى حياتك العملية فى اليوم الثالث أو العشرين أو الألف ،،

مقدرة فريدة على الحكى  تفوق بليغ الوصف ،،،،،،،،

وقد تلحظ معى أنه يستأثر بالجلسة بمفرده ، فيكون المتحدث الأوحد فيها ، بفن ومهارة واقتدار يعجز عن مثل مثله أديب قصاص ، أو كاتب روائى ، أو خطيب فصيح ، أو لسن بليغ  ،،،

أمال ،،، أمال ،،،

هو ذا ،،،،،،،،،،،،،،،،،،،،،،،،،،،،، الإبدااااااااااع فى وجع الدمااااااااااغ  .

فتأمل .

صلاح جاد سلام

***********************

***********************

الوسوم: أدب صلاح جاد سلام قصة