قصيدة : (( فوانيس )) .. بالعامية المصرية
---- من المدرسة التناغمية الحديثة------
.
. د. سيد غيث..
أنا معتكف داخل تلافيف القلوب
روضت عصياني..!
يمكن أدوب رهبه وخشوع -
سابح في شرياني..!
يصلي الدم في عروقي .. أقول الله .. وأتهجد ..
فعوم عكس الأذين ..دوره
وأعشش ف البطين .. دوره
وأتعبد .. ما بين العصر .. والمغرب
أفتش عن سنا ايماني..!!
فيبان طريقي من خلال ضي السبح الكهرمان
يا زمان بطعم ( المستكة والحبهان )..
الشهر عطر ذكرياتي بالايمان ..
وهداني شمعه وكام فانوس..!
ارشدني يارب الملايكة.. لضلتي ..
لو مره ضيعت الطريق في رحابه تسرج سكتي بشموس .
ودا.. لما كانت جدتي .. بتحكي حكايات
وتقول .. رمضان كريم يا ولاد..
هزوا في هلاله .. تسابيح .. وذكر الله وجلاله .. وبلاد بتتزين عشانه..
وبجملة الأشواق..
منساش يطبطب ع الجروح ..
ويطيب الوجع الآليم ..
منساش يطبطب ع الفقير .. وعلى اليتيم ..
يا.. دموع بتسبق في الدموع..
عاوز أعترف ان الحياه من غير ايمان .. من غير خشوع ..
زي الجسد لحظه ممات منزوعه منه ألف روح..!!
