معادله
كلمات مرفت جابر
.
......
مهما زاد البُعد بنّا
سامعه صوتك
شمّه عطرك
حسّه روحك جوّه منّي
وامّا عيني تزور مرايتي
بالقى صورتك فوق جبيني
الشفايف هيّ هيّ
والخدود المستحيّه
نظرة الشوق اللي قاعده
بتناديلك وتناديني
مش غريبه تشوفني عيني
حتّه منّك
مش غريبه ف ليلي أحلم
نفس حلمك
والمسافات البعيده
مش ح تبعد قلبي عنّك
أصل تفاصيلنا اللي عاشقه
ف المعادله اتنين ف واحد
مهما كان البُعد باعد
روحنا واحده
مش ح تقبل قسمه خالص
أي شئ ف الطرح ناقص
واحنا حالة جمع كامله
ضاربه كل فراق وعامله
ف القلوب أجمل عمايل
والمسافات الطويله
باعته طير الحب شايل
ضحكه فوق خد الرسايل
والدفا بين السطور
كل حرف بيبقى كلمه
كل كلمه بتبقى نور
سطر يشبه للملايكه
سطر ضحكة وش حور
ف السما واقفه الطيور
خط دايما مستقيم
مهما كان الريح عنيد
والحمام زاجل بريد
كل ثانيه جواب يجيني
كل لحظه جواب يروحلك
قلبي بالحب انفتحلك
شئ طبيعي ف المعادله
أي ناتج حِسبه بنّا
ف النهايه رح يساوي
بعد طرح البُعد ..
واحد
