سراب
كلمات مرفت جابر
...
....
كل شئ غامق ف عيني
لون رمادي
واللا إسود
أي لون أبيض بيحوِد
برّه حد الرؤيه عنّي
كل شئ غامق كاسرني
واتمحى اللون اللي فاتح
قلبي كان للحب فاتح
ألف سكّه وألف باب
كان يجيب الشمس صابحه
حتى من بطن الضباب
النهارده الليل بيفتح
ألف باب للإكتئاب
كل شئ أصبح سراب
حتى ضحكة وش يومي
مش حقيقه
ضحكه ساذجه بألف حاله
ضحكه دايما مش بريئة
بتلاعبني كام دقيقه
بعدها تفتح عليّا
م السحابه بحر مطره
كنت قبل الحزن شاطره
كنت ادوس ع الصعب وامشي
قلبي كان قد المخاطره
ما انسحبتش من مواجهه
ما انهزمتش حتى مرّه
إنما ما بقيتش قادره
أستخبّى من عذابي
من جراحي
من دموعي
قلبي محبوس بين ضلوعي
بس صوت الدق عالي
صوت أنيني
صوت أهاتي
صوت وجيعتي
صوت بيعلن شكل حالي
ألف دمعه مكتوبالي
رغم إنّي كنت دايما
باكسر الأحزان بضحكي
النهارده العين بتبكي
من هموم الكون بحاله
هم روحي
هم قلبي
هم حبّي
والجراح جوايا تحبي
قافله عين الشوف عليّا
كل شئ ف العين هُلامي
والحقيقه متداريّه
قلبي كان أكبر ضحيّه
لمّا راح ف طريق هواهم
وامّا داق الإغتراب
قلبي كان جوّايا جنّه
زرعوا ف الجنّه العذاب
كل شئ فعلا سراب
و النهارده خلاص يا
قلبي
م الغرام ..
عامله انسحاب
أكتب تعليق