ذكريات جميلة
محمد حبشي
1-
أيوه انا ساكن جوة الحفرة ،
مع عفريت
ب يحب الكفرة ،
حرق لي هدومي ، وأثناء نومي ،
قام وسرقنا ، ولَم ورقنا ،
أش ب كومي
رزق بلدنا ،
مات أولادنا زي الحشرة ..
ضرب الضربة ،
رمانا
ب حَربة ،
فتح التُربة ، وفاز ب العَشَرَة ..
2- أيوة انا قاعد ب العب طاولة ،
وسط العَفَرَة ،
ف مقهى الدولة ،
مع سلطان
عايش في الجنة ،
مع جواريه من الستات ،
أكل التورتة ،
وسابني ف ورطة ،
باع حواريه ، وساب لي فُتات ،
وكلاب عايشة
وسط غيطان ،
ماسكة ف إيدها كل خيطان ،
واحنا عرايس خلف حيطان ،
خسرنا الحلم
ف آخر
جولة ،
عايشين بلا قوة ولا حَوْلَ ..
3- أيوة انا ساكن جوة الحفرة ،
وساكت دايماً
غصبٍ عني ،
وقاعد ظلي جنبي يغني ،
ومعاه ذنبى ، وكورال خيبتي ..
وليه
يا حبيبتي ،
سايبة الدمع زمان مستني ،
تطلع شمسي ،
تزرع قوتي ،
يصعد نجمي ، ويعود صوتي ،
واعيش تاني عمري كأني ،
طفل وليد
من غير كسرة ،
حلم جديد من غير حسرة ..
4- أيوة انا عازم ، فى الفضا روحي ،
وصمت آهاتي ،
وكل جروحي ..
ودابح يأسي ، وجروح نفسي ،
وحاشي ف راسي
مليون فكرة ..
وطابخ حلمي ، وعامل فتة ،
وعازم عيسى
وموسى
ومَتَّى ،
ف حلقة ذكر من غير فتنة ،
من غير أُمَرَا ووزَرَا
وسُفَرا ،
حوالين سفرة طويلة ف بيتنا ..
5- أيوة انا دافن صوتي ف صدري ،
وسايب حوتي ، في بحور صبري ..
وحابس خوفي ،
في كهوف
جوفي ..
وعايش ميت ، من غير ما ادري ..
وكمان شايل إسمي وهمِّي ،
وحلم مغَمِّي ،
ب يجري ف دمي ..
وخايف موجة ، تمحِي الذكرى ،
وشايف بكرة ،
وآخرة صبري ،
ورياح غدر ، ب تحفر قبري ..
6- أيوة انا عايم ف بحار نومي ،
وساعات يومي ،
يعوم على عومي ..
وساعات حلم ،
زي الجِنِّي ،
يوعد يبعد ، يخلِف ظني ..
وساعات يعند ،
يهرب مني ،
وأعيش تايه وسط الزحمة ،
عاشق دنيا ،
مفيهاش
رحمة ..
عايش عمري من غير طفرة ..
لابس عمة ،
من غير ذمة ،
لافف حلمي ف ورقة بفرة ..
7-
أيوة انا ساكن ، فى سجون ألمي ..
وجنون روحى ،
ب يرفع علمي ،
وينَسيني
مواقف خطرة ،
تجرف أملي ، شوية مطرة ..
وافضل عمري ، أمْلَى فى حبري ،
واكتب جرحي ،
ب حروف
عِبري ..
وانسى ف غُمة ،
قضايا الأمة ،
واعقد قمة ، ما بين الكفرة ،
وارسم خط ، وافك الشفرة ..
