معلش يا بحر
حنان الجوجري
يا بحر معلش سامحني
جايالك ع الدنيا
تصالحني
خليها تبتسملي وتاخدني
بالأحضان
وتديني وشها وتعاملني
بحنان
دي سنين طويلة عطياني
ضهرها
إسألها ليه وشوف إيه
ردها
واعرفلي ليه دايما مبكياني
وليه من الفرح فيها
حرماني
يا بحر إتحملني من فضلك
من ضيقتي جيت أفضفضلك
إسمعني وصفيلي نيتك
دي دموعي إختلطت ب ميتك
يعني بقى فيه صلة ما
بينا
وماحدش هيقدر يفرق بينا
يا بحر أرجوك تساعدني
واترجى الدنيا تسعدني
وتحذف الأحزان من حياتي
وتمسح بإيديها دمعاتي
حاول يا بحر تتكلم
معاها
وياريت يا بحر حكايتي
ما تنساها
ده إحنا بقينا معرفة
خلاص
وحبي ليك كله إخلاص
ودموعي آهه بتجري ف
امواجك
واسأل عليها حتى أفواجك
يقولولك أيوة يا بحر
شايفينها
وحرقة دموعها كمان
حاسينها
معلشي يا بحر ركز معايا
واسمع مني كل إلي جوايا
أنا جيتلك يا بحر وانا
على أخري
وعارفه كمان إني جيتلك
واخري
بس معلش يا ريت
تستحملني
وبعطفك وهدوئك تعاملني
وتحللي مشكلتي دية
وتصالحنا مصالحة أبدية
يعني بعد كده الدنيا
ماتزعلنيش
ومن إبتسامتي تاني
ماتحرمنيش
وتقضي على كل آلامي
وتحققلي كل أحلامي
شكرا يا بحر عشان سمعتني
وبفضفضتي ليك ريحتني
كان نفسي أوي حد يسمعني
حاولت كتير والكل دمعني
محدش يابحر وقف جنبي
ومش عارفة يا بحر إيه
ذنبي
جايز يكون عشان طيبتي
ولا عشان عبطي وخيبتي
على كل حال انا شاكرة
أفضالك
ودايما هتلاقيني محافظة
على وصالك
طلعت شمس النهار أسيبك
بقى يا بحر
طولت عليك أنا معلش
معلش يا بحر
خواطر / حنان الجوجري
