حامد حبيب
أفلاطونى
لمّيت كل المواجع
على كفّ الأدب وسكِتّ
وحبست النفس
عن شهوة حنينها
للصُّراخ
والحلم واقف منتظر
باب الفرج
ياااااه
على طول انتظارك يا
غريب
شاطر تسوق مواويلك
على طرح البلح
وتسقى الجذع اللى مادد
فى حشاها
سنين دموع وسنين ألم
واقف وحيد
ولاحد سامع شكوتك
راخر لاعمرك هتطول
ولا....
تلمس إيديك مرّة راس نخلتك
خليك ونُوح على جذعها
والطُم سنين الذكريات
على خدّها
وابقى قابلنا لو فلَحت
..........
أفلاطونى النزعة
عمّال بترسم سكّتك فى
الفراغ
خيالك وانت حر تطير
يارب يوصّلك
ترسم على وش الفضا أجمل
مدينة
بس احترس
خاف م الوقوع على أرضنا
لحسن يموت آخر ماتملك
/ولرُبّما
يبقى دفن الجُثّة
هناك بعيد عن نخلتك
..........
اقلب الكف اللى مادُّه
للنهار
حاول الحلم اللى شدّك
تشعل فى حشاه النار
أو....تعلن من سجن
جناته الفرار
واقلب سحنتك أحسن تعيش
وتطول كل البلح فى
نخلتك
أو .......تموت
--------------------
حامد حبيب _ مصر
