مرفت جابر
فلسفات الكون
كلمات مرفت جابر
..........
......
للحياه ميت ألف شكراً
للإله ميت ألف حمد
قلبي حب خلاص بجد
والتقيت ف الحب معنى
فلسفات الكون بحاله
حتى لحظات التمرّد
واللا لحظات انشغاله
قلبي فعلا مكتوباله
كل ألوان السعاده
سكر الحب الزياده
خلّى لون الدنيا وردي
راحة البال اللي عندي
واخده قلبي وطايره بيه
كل شئ يا عيوني تايه
بس ف الحب تلاقيه
فاكهة الجنّه الجميله
ورد والعطر اللي فيه
طب ح اعوز م الدنيا إيه
أغلا من خوفك عليّا
واللا نظرة شوق ف عينك
دا الغرام ف الدنيا ديّا
كُلّه كان بيني وبينك
يكفى إحساس الطفوله
لمّا تفرد إيد واجيلك
واللا ترفعني بيمينك
زي طفله ف إيد باباها
لسّه بتتهته حروفها
عايشه سنوات البلاهه
حضنك انت اللي احتواها
واللي علّمها حكايات
ضحكتك سكّر نبات
نظرتك فراشات بترقص
رقصة العيد للزهور
زقزقات كل الطيور
لمّا بتشوفك معايا
دا الغرام يا حبيبي آيه
قلبي بيرتل حروفها
وف ختامها يلاقي إسمك
طول ما قلبي بنبضه عايش
شئ طبيعي الشوق يكونلك
والغرام لو سجن حتى
ف الغرام ..
أنا عاشقه سجنك
