مرفت جابر
ياقلبي أسفه
كلمات مرفت جابر
قلبي يا عابر سبيل
صحرة الأيام بخيله
ياقليل ف السكّه حيله
موت بعطشك
واللا أعصر مُر واشرب
من شجر صبّار قصادك
بل ريق الحزن يمكن
بالمراره تعزّي نفسك
دالسراب لحظّة ما عاكسك
روحتله من غير ما تدرى
كام سنه ف الصحرا ماشي
جوّه ليل مالهوش نهايه
والغريبه ف الحكايه
ليلها رافض ضي بكره
كل شئ ف الصحرا نكِره
وانت شئ معروف نهايتك
موت بحزنك
موت بجوعك
موت بوجعك
كنت غالي وبعت نفسك
لمّا وعدك بالسحاب
المطر ما نزلش أبدا
واللي شايفه يادوب سراب
وف طريق الغدر باعك
حتى أرخص م التراب
قلبي يا طعم العذاب
باعتذرلك
كنت عارفه السكّه ضلمه
بس غصبن عنّي سيبتك
كنت ف الأحزان شريكتك
قولت جايز
قولت يمكن
لمّا ليل العتمه يخلص
ييجي بكره بفجر يدّن
إنما ما اقصدش أبدا
أهزمك من دي المجازفه
كنت عايشه ف وهم حلمي
رغم إنّي كنت خايفه
باعتذر ياقلبي أسفه
كان غبائي سبب مباشر
ف انكسارك وانكساري
كان غبائي سبب مُباشر
ف انهيارك وانهياري
جنّتك دخلت ف ناري
واتحرقنا ف النهايه
كنت بيك ست الصبايا
وبغبائي صبحت جاريه
كنت فاكره الميّه جاريه
مش سراب حاضن سراب
كنت فاكره ح اشد إيدك
برّه حد الإكتئاب
جيت معايا بدون مجادله
فجأه غطّانا الضباب
قوم وغيّر خط سيرك
مش ح الومك
لمّا عكس الضل تمشي
وامّا تعمل ..
إنسحاب
.......................
