مرفت جابر
تصريح للجنّه
كلمات مرفت جابر
تصريح للجنّه
كلمات مرفت جابر
................
سنين تسحب سنين تانيين
وناس جوّه القصور عايشين
وناس ف الدنيا مش طايلين
يادوب إلا الرغيف الحاف
يسقّوا اللقمه بالميّه
وفرشه بسيطه ما تكفّيش
يناموا عليها خِلف خلاف
وناس ريش النعام فرشه
وفوقها حرير بيبقى لحاف
حاجات بتعجّز الأوصاف
وتدبح كل صاحب قلب
حاجات أصعب كتير م الصعب
وم الدمع اللي جوّه العين
وم الكلمات
فقير فوق الرصيف بيبات
وبطن بتشتكي م الجوع
مافيش للفقر صوت مسموع
ف دنيا بتعشق المظهر
مافيش غير ناس بتستخسر
بواقي الأكل ف المحروم
وغرقانه ف ملذّاتها
وناس قطر الشَبَع فاتها
وناس مرميّه ع الرصفان
يا صرخة جوع من الغلبان
يا دمعة قهر م المسكين
يا ناس بتعبّي بالملايين
مافيش إحسان ؟
مافيش شفقه ؟
مافيش صدقه ؟
حجاره من الجحيم راشقه
ف قلب اللي اتعجن بالبُخل
وبطن اللي ف طبيعته شحيح
دخول الجنّه له تصريح
ما بينولهوش غير المؤمن
وفاهم يعني إيه رحمه
مش اللي بيجمع الأموال
ويحرم غيره م النعمه
ولا اللي يشوف ويستعمى
ويطلع فوق كتاف الغير
مافيش ف القبر مال ينفع
ولو كان حتى بالقناطير
دي بطن القبر ما بتعرفش
تفرّق ...
بين غني وفقير
