أمل اللقا
كلمات مرفت جابر
......
...
كما الورده اللي دبلانه
بتترجّى الربيع يرجع
كما الأم اللي فقدانه
ضناها وقاعده تتوجّع
كما الصوت اللي بات ملهوف
ومش لاقي ودان تسمع
أنا يا حبيبي باتلوّع
وباتمرجح ما بين بعدين
ما بين بُعدك وأشواقي
وبين روحي المفارقاني
باعاني وقلبي بيعاني
باموت واحيا على طيفك
وما القاكشي ..
أموت تاني
والاقي الذكرى واخداني
تمرجحني على الجنبين
لا عارفه جيّه ليه وازاي
ولا رايحه كمان على فين
واغمّض عين
وافتّح عين
واشوف طاقة نهار تتشق
والاقي القلب زاد نبضه
وزاد صوت الوريد بالدق
يا قلبي صارحني قول الحق
ح يرجع والا مش ح يعود
يرد القلب ويقوللي ..
ح يرجع ويّا أول ضوء
وانا سهرانه طول ليلي
وباستنّى لرجوعه شروق
عشان قلبي أكيد أصدق
أكيد قلبك ح يشتاقلي
ويجري ف الهوا ويسبق
مازال أمل اللقا قشّه
وقلبي غريق بيتعلّق
وانا بصراحه ما باصدّق
م انا عايشه الحياه دايما
على أمل اللقا الوردي
وانا شايله الورود عندي
عشان حالفه العبير ما يفوح
ياروح الروح ..
سِوى ف حضنك
