واد حرّيف
كلمات مرفت جابر
........
....
على شجر الذكرى المركونه
بين الشرايين
إتعلّم تبقى تمللي اتنين
واحد برّاك
وانت التاني
وان شوفته حزين
سيبه يعاني
إنما إنت ..
من غير ما يكون مخلوق
شايفك
إتمرجح واسرح بخيالك
وناديني ح تلقاني قُبالك
وان كنت مجرد صوره وطيف
ما تكونش ف دنيا الحب
ضعيف
إسند على شجر الذكرى بإيد
واكتب حرفين على سهم وقلب
إتعلّم تفاصيل العشاق
إزاي عايشين
وازاي قادرين
رغم المسافات والبُعد ..
تحب
إيّاك تتسنّد ع الأوجاع
وتقول الحب دا عدّى وفات
دا الحب بطبعه حالات
وحالات
بين قرب وبُعد
أو بُعد وقُرب
ف بلاش تتحجج بالمواضيع
وتضيع ..
وتجيب ع الحب الذنب
وان عشت ليالي البُعد
الصعب
أشواقك إوعى تخبّيها
وطريقك ..
رُشّه نبات صبار
إتعلّم تقدر تتعايش
مع تلجك وانت ف عز النار
وان كنت بتؤمن بالأقدار
رح تعرف إن الجي للشوق
والحب ما يعرفش استجمام
وبيسهر لمّا لأوّل ضوء
إصنع بخيالك شهد ودوق
ح تلاقي الطعم ما يتغيّرش
ما تبيعش غرامك بالساهل
وتمللي لقلبك قول .. معلش
إتحمّل مهما تدوق مرارات
دا مازال العمر معاك ما
خلصش
وان قلبك واد حرّيف أشواق
صدّقني ح يقدر وحدُه يقُش
بس انت استنّى ما تستعجلش
ولواحده ح يبقى القُرب
متاح
سيب المشاوير تطرح أزهار
سيب الأحاسيس تطرح أفراح
وان كان دلوقت الشوف
ممنوع
رح يبقى أكيد من بكره
مُتاح
مع ضحكة شمس دفاها براح
العتمه ح تهرب م الصوره
والدمعه ..
ح تخرج م البرواز
إعمل من صبرك إيد عُكّاز
واتسنّد ح تعدّي المشاوير
وحياتك لسّه قصادنا كتير
يقدر يسعدنا كمان عمرين
يقدر يخطفنا من الأحزان
وياخدنا مكان مليان
بساتين
ح نلاقي الجنه ف قلب
النار
ونلاقي نهار حاضن شمسين
صدّقني مافيش ف الحب
اتنين
ما شافوش أحزان قبل
الأفراح
ما شافوش دمعات
ولا داقوا جراح
إنما وحياتك كلّه يهون
مع نظرة حب هواها جديد
أرواحهم ترجع وترفرف
بجناح ف ساعات اللقا
تحديد
ويشوفوا الدنيا بقت جنّه
دخلوها ف أوّل ليلة عيد
ويعودوا كأن يادوب لسه
على إيد الشوق ..
إتنين مواليد
