مرفت جابر
...............
سلّملي عليك
أول ما عينيك
تصحى من النوم وانا مش جنبك
م انا حتى ان كنت بعيده معاك
وب أقوي هواك لحظة ضعفك
واتعلّم تفتح باب قلبك
وتخش تشوفني هناك قاعده
وان كنت مشيت ف أكيد راجعه
باتمشّى شويه عشان تشتاق
صدّقني مافيش زيّنا عشّاق
رغم المسافات قاعدين مع بعض
ما تفرّقهمش حدود الأرض
ولا تمنعهمش حدود م الشوف
وغرامنا عشان دايما ملهوف
شايفاك بعنيك وانت شايفني
بعيوني وقلبي وأشواقي
م انا شهد عليه بتبل الريق
وباشوفك بالشوق ترياقي
وبيخلص عمر ودنيا وكون
وغرامنا يكون ..
هوّ الباقي
خلّيك ف الهوى قلب بدائي
من عصر الأساطير والحواديت
عنتر عبله
قيس مع ليلى
روميو وجولييت
وابعتلي الورد لحد البيت
متعطّر بعبير أنفاسك
هد المسافات لو حتى جبال
بخيال .. متقوّي بإحساسك
د انا كل ماليك
أهلك
ناسك
وحوريّه .. عينيك هيّ ملاكي
وانا باسهر وافتح شبّاكي
وباشوفك ضي من القمره
وباشوفك حتى على الجدران
واسرح واسألني بصمت الشوق
إن كنت حبيبي كمان سهران
ف يرد القلب اللي ف قلبي
ويقوللي بأجمل صوت هيمان
ويقوللي كمان
وحياة الحب وحشتيني
تتجسّد فجأه قصاد عيني
قُدّامي كمان وانا قٌدامك
صورتك وملامحك وكلامك
وجمال الحب ف ضحكتنا
وحياة الحب اللي تالتنا
ما تفرّق بنّا حدود الكون
الشوق رح يقدر يجمعنا
ماهو أصله ملاك بجناح وعيون
بالعقل ياخدنا لأحلى جنون
وجنونه بيرضيني ويرضيك
خلينا نعيش برّه المعقول
والممكن بإيديّا وبإيديك
د انا عايشه حياتي بافكّر فيك
وان قومت ف يوم وانا مش جنبك
سلملي عليك
