مرفت جابر
لا مؤاخذه
كلمات مرفت جابر
...........
عقلي خلاص ما بقاش يستغرب
من أحوال البني أدمين
إللي ما حدّش عاد بيسامح
ولا بيطبطب ع المساكين
واللي ف غمضة عين لامؤاخذه
ماسكين على بعض السكاكين
واللي بيشتم
واللي بيلعن
واللي بيرمي الغير بالطين
دايما بالمح كل اتنين
واحده بواحده وند بند
حتى الواحد يمشي لواحده
يلقى خياله بيمشي ف ضد
واللي يحاول يبني ف ثانيه
هوّ بيبقى زعيم الهد
ما بقاش حد بيخشى كبيره
والطول أصبح زي العرض
كله بيرمي الغير بالباطل
كله يخوض ف المال والعِرض
واللي يحاول يرخي شويّه
قبل ما ثانيه تفوت بيشد
واللي يدوس ع الناس ويمد
حتى ان كان ف السكّه عجوز
عمر ما تلمح وشّه بيضحك
إنما دايما ضارب بوز
واللي بيسرق
واللي بينهب
واللي بينصب
حتى ولو يعمل أراجوز
واللي يقول انا مش محظوظ
رغم الحظ تمللي معاه
واللي بيجمع مال ويكنّز
إنما ماشي يقول لله
واللي يقول الدنيا كئيبه
ومافيش حاجه تكون عاجباه
واللي ف دنيا العشق بيعشق
إنما إسم حبيبه نساه !!
واللي بيقدر يرمي ضناه
واللي الرحمه اتنزعت منّه
دنيا وفيها الناس اتجنوّا
علشان كده بطّلت استغرب
من أحوال البني أدمين
....................................
ديوان خليك انسان
