مرفت جابر
كارت ميموري
كلمات مرفت جابر
...........
.......
كارت ميموري ..
لسه ف جراب الموبايل
شايله فيه كل اللي فات
كارت ميموري الذكريات
تسجيلات كل اللي عدّى
قلبي خش هواك وهدّى
واحده واحده ف الطريق
ليه ما كنتش يوم برئ ؟
عمري كانلك زاد وميّه
والنتيجه قسيت عليّا
كنت ف إيديك الضحية
إللي من غير دبح حتى
سبتها ف بركان حريق
نار شمالها
نار يمينها
نار بتحرق كل شئ
كلمه واحده تبل ريق
كنت تبخل حتى بيها
كنت شايف قلبي لعبه
وانت رافض تشتريها
رغم كانت شايله همّك
لعبه كان أكبر ذنوبها
إنها عاشت لحبك
حضنها بستان محبّه
قلبها كان دقُّه منّك
ياما كانت تنسى روحها
وتداديك كما قلب أمك
قد إيه كان قلبي عايش
ف الحياه علشان يضُمّك
والنتيجة كسرت خاطري
حتى ما همّكش أمرى
حتى ما همّكش أبدا
جرح روحي
جرح قلبي
دمع عيني
كل شئ بينك وبيني
بعته أرخص م التراب
كان هوايا بجد جنّه
كان هواك أكبر عذاب
قد إيه عشت اغتراب
جوّه نفسي وانت جنبي
قد أيه ضاعت ملامح
روح عليك كانت بتحبي
كنت بأمر عيني تضحك
والدموع باحدفها جنبي
وانت دايما كنت قاسي
كنت جاحد
كنت ظالم
وف هواك ضاعت معالم
حتى ضاعت حاجة منّي
اللي ضاع مش حاجه سهله
اللي ضاع ف الأصل قلبي
وامّا روحي تحن لحظه
إيدي تجري ع الموبايل
وافتكر كل اللي عدى
لمّا بافتح ...
كارت ميموري
أكتب تعليق